Молитвословие

Молитва Святому Царю мученику Николаю (из акафиста)

О, святый страстотерпче царю мучениче Николае! Господь тя избра помазанника Своего, во еже милостивно и право судити людем твоим и хранителем Церкве Православныя быти. Сего ради со страхом Божиим царское служение и о душах попечение совершал еси. Господь же, испытуя тя, яко Иова Многострадальнаго, попусти ти поношения, скорби горькия, измену, предательство, ближних отчуждение и в душевных муках земнаго царства оставление. Вся сия ради блага России, яко верный сын ея, претерпев, и, яко истинный раб Христов, мученическую кончину прием, Небеснаго Царства достигл еси, идеже наслаждаешися Вышния славы у Престола всех Царя, купно со святою супружницею твоею царицею Александрою и царственными чады Алексием, Ольгою, Татианою, Мариею и Анастасиею. Ныне, имея дерзновение велие у Христа Царя, моли, да простит Господь грех отступления народа нашего и подаст грехов прощение и на всякую добродетель наставит нас, да стяжим смирение, кротость и любовь и сподобимся Небеснаго Царствия, идеже купно с тобою и всеми святыми новомученики и исповедники Российскими прославим Отца и Сына и Святаго Духа, ныне и присно и во веки веков. Аминь.

Тропарь Николаю II, Императору Российскому, глас 5

Царства земнаго лишение, / узы и страдания многоразличныя / кротко претерпел еси, / свидетельствовав о Христе даже до смерти от богоборцев,/ страстотерпче великий Боговенчанный царю Николае, / сего ради мученическим венцем на небесех, / венча тя с царицею и чады и слуги твоими Христос Бог, / Егоже моли помиловати страну Российскую / и спасти души наша.

Тропарь Царственным страстотерпцам, глас 7

Ангели земли Российския,/ и воскресения ея путеводителие,/ Царю Николае и Царице Александро,/ начавшемуся богоотступлению,/ Державою благоверне правившии,/ и юныя Великия Княжны,/ в трудех и милосердии добре подвизавшияся,/ и Царевичу- страдальче Алексие,/ -Царственнии страстотерпцы,/ яко агнцы незлобивии,/ от безбожных губителей Руси/ мучимии и закланнии,/ ныне же царство вечное приимшии,/ молитеся Небесному Царю Царей/ о Державе сродников ваших,/ просветитися ей верою отцев// и покаянием паки возродитися.

Тропарь Царственным страстотерпцам (из службы), глас 4

Днесь, благовернии людие, светло почтим/ седмерицу честную царственных страстотерпец,/ Христову едину домашнюю Церковь:/ Николая и Александру,/ Алексия, Ольгу, Татиану, Марию и Анастасию./ Тии бо, уз и страданий многоразличных не убоявшеся,/ от богоборных смерть и поругание телес прияша/ и дерзновение ко Господу в молитве улучиша./ Сего ради к ним с любовию возопиим:/ о святии страстотерпцы,/ гласу покаяния и стенанию народа нашего вонмите,/ землю Российскую в любви к Православию утвердите,/ от междоусобныя брани сохраните,/ мир мирови у Бога испросите// и душам нашим велию милость.

Кондак Царственным страстотерпцам, глас 3

Днесь ублажаем Царственныя страстотерпцы,/ первее богоугодне России послужившия,/ труды и скорби велия понесшия,/ от богоборцев за благочестие возненавиденныя,/ и сего ради яко Православия столпи,/ слугами диавола убиенныя./ Молим вы, святии мученицы:/ Николае, Александро, Алексие,/ Ольго, Татиано, Марие, Анастасие,/ молите Христа Бога// благочестием просветити люди ваша.

Кондак Царственным страстотерпцам (из службы), глас 8

Избраннии Царем царствующих и Господем господствующих/ от рода царей Российских,/ благовернии мученицы,/ муки душевныя и смерть телесную за Христа приимшии/ и венцы Небесными увенчавшиися,/ к вам, яко покровителем нашим милостивым,/ с любовию благодарне вопием:/ радуйтеся, царственнии страстотерпцы,// за Русь Святую пред Богом усерднии молитвенницы.

Величание Царственным страстотерпцам

Величаем вас,/ святии царственнии страстотерпцы,/ и чтим честная страдания ваша,/ яже за Христа// претерпели есте.